وده بقيت الحوار
صحيح انك اشترطت على الأهلي انك تقيد أفريقيا ؟"يقاطع" انا مشترطش على حد الكلام ده مش صحيح
- طيب معروف ان مفيش لاعب من اللاعبون الجدد ضامن مكان في القائمة الأفريقية فالموضوع هيبقى صعب وممكن لا تقيد افريقيا هل ده هيحزنك ؟
انا كلاعب اتمنى اشارك في كل البطولات المهمة لكن لو النادي مسجلنيش فدي ظروف النادي وانا هأدي اللي عليا في المباريات اللي هشارك فيها في أي بطولة
- انت متابع صفقات الأهلي الجديدة الموسم ده ؟
اه متابع
- شايف ايه الصفقة اللي لفتت نظرك وشايفها مهمة جدا ؟
هو النادي الأهلي لما يعمل صفقة لازم تبقى لاعيبة هتفيدوا ياعني الأهلي مبيجريش وراء صفقة الا لو هتفيدوا وطبعا اتمنى ان كل الصفقات اللي جت الأهلي تفيده لأن الأهلي فريق بطولات
- مين لاعب في الأهلي لما بتشوفوه بتكون سعيد انك هتلعب بجواره ؟
كلهم نجوم ياعني الأهلي 7 او 8 لاعيبة في المنتخب المصري والمنافسة معاهم هترفع أي واحد
- سعيد انك هتلعب بجوار لاعبين أمثال ابو تريكة وبركات ؟
أكيد طبعا وأحمد حسن كمان ووائل جمعة وزي مقولتلك الأهلي كله نجوم
- مين لاعب في الأهلي حاسس انه قريب من طريقة لعبك واسلوب ادائك ؟
انا مقدرش اقول انا قريب من ده او ده دي حاجة يحكم عليها الجمهور
- احنا في مصر هنا لما شافوه طريقة لعبك وادائك وفيديوهات ليك قالوا انك شبه بركات بشكل كبير ؟
لأ طبعا محمد بركات لعيب كبير واتمنى اني اصل لمستواه واتمنى اني يكون اسمي عند جمهور الأهلي زي اسم محمد بركات في يوم من الأيام محمد بركات ليه تقله ووزنه في الملاعب ومع منتخب مصر ليه خبرة كبيرة وبطولات كثيرة واتمنى اني اكون مثله واكون عند حسن ظن الناس
- كأهلاوي مين من لاعيبة الأهلي زمان كان نفسك تطلع زيه او كان نفسك انك تكون موجود في جيله وتلعب جنبه ؟
كنت بحب اتفرج على وليد صلاح الدين حتى لما كان بينزل 10 دقايق او ربع ساعة فنياته كانت بتمتع كل اللي بيتفرج عليه
- هل استقريت على الرقم اللي هترتديه مع الأهلي ؟
لأ لسة معرفتش هعرف بكرة في المؤتمر الصحفي
- مانويل جوزيه بعد التعاقد هل حصل بينكم أي اتصال تليفوني ؟
لأ مفيش أي اتصال
- مين من الجهاز الفني كلمك ؟
الكابتن حسام البدري
- وايه اللي دار بينكم ؟
هو باركلي لأنضمامي بس انا كنت بعيد مع المنتخب ومكنش في فرصة نتقابل بس اتفقنا اني هسافر المعسكر يوم 1 / 7 إن شاء الله
- مين من لاعيبة الأهلي تربطك بيه علاقة شخصية وصداقة ؟
اه في كذا واحد اسامة حسني و امير عبد الحميد وكان بيجي حسام غالي وكنا بنزور بعض في بلجيكا وهولندا ورامي عادل وكان وائل رياض كمان بس يمكنعلشان بعدي عن مصر فكانت العلاقات مش قوية اوي
- كنت بتتابع مباريات الأهلي ؟
اه طبعا كنت بتابع الأهلي في بطولة العالم ووقتها كانت الناس كلها بتتكلم عن النادي الأهلي
- وكنت بتابع الدوري المصري ؟
احيانا بس مش كتير
- شايف ازاي هيكون الموسم الجاي للأهلي ومدى صعوبته وهل تتوقع منافسة محلية على الدوري العام هذا الموسم ولا كالمعتاد هيكون الأهلي قطب أوحد في البطولة كما هو الحال في الفترة الأخيرة ؟
المنافسة دايما قوية والفرق بتتحسن والفرق كلها لما بتلعب قدام الأهلي بتبقى عايزة تظهر كل امكانيتها فالموسم القادم مش هيبقى سهل
- احكيلي عن علاقتك بالأعلام الرياضي في كل الدول اللي احترفت فيها ؟
لأ الحمدلله انا معنديش أي مشاكل مع الأعلام وبأدي دوري كلاعب محترف واكيد في يوم من الأيام صحفي ينتقدك وصحفي يشجعك ويحبك فده شئ طبيعي
- بيقولوه الأعلام المصري شوية "مخربش" وصعب حاسس ازاي هتكون العلاقة معاه
؟
مظبوط هو الأعلام في اوروبا اقل ضغطا من الأعلام في مصر الأعلام المصري قوي وفعلا ناس بتهتم كتير
- حاسس انك قلقان منه ؟
لأ مش قلقان وبتمنى التوفيق من عند ربنا طبعا وانا مش بسمع كتير ياعني بحاول اعمل اللي عليا في الملعب وبأدي دوري في الملعب بس أحسن من تضيع الوقت في الكلام الكتير
- ازاي حاسس اللقاء الأول بينك وبين جماهير الأهلي خاصة انه يحتمل ان يكون لقاءك الأول بيهم يكون في مباراة الزمالك واكيد هيكون الأستاد مقتظ بجماهير الأهلي ؟
والله هتبقى مسئولية كبيرة طبعا ماتش مهم وماتش صعب وانا بالنسبالي كل الماتشات زي بعضها لكن بالنسبة للجماهير هي مباراة دربي والواحد بيبقى سعيد انه يلعب في الدربيات الكبيرة دي
- طيب هل انت سعيد انك هتشوف الجماهير دي كلها في اول مواجهة ليك ولا قلقان ؟
لأ انا سعيد جدا طبعا انا بحب المواجهة واحب اني اكون متواجد واتمنى ان يكون ليا دور مؤثر مع الفريق واشارك ان شاء الله واللي بتمناه ان الجمهور مايمثلش ضغط على اللاعيبة لأن من غير ضغط هنأدي اللي علينا خاصة مع المجموعة الكبيرة الموجود من النجوم دي
- حاسس ان الأهلي هيكون نقطة فاصلة في حياتك الكروية ولا مجرد مرحلة في اكبر نادي في افريقيا تكون بوابة ليك للعودة للأحتراف الخارجي ؟
بالنسبالي ان الأهلي لم جيه طلبني ده كان حلم بالنسبالي الناس كلها بتحبه والأعلام كله بيسانده وأكبر نادي في افريقيا ده غير اني رجعت بلدي وده يفرق معايا كتير ونقطة ايجابية بالنسبالي فده شئ طبيعي اني أفضل الأستقرار لكن انا عارف عن طريق الأهلي لو كملت بمستوى طيب ممكن ارجع تاني اوروبا واحترف
- طيب سؤال وده بقى يهم جماهير الأهلي جدا في الفترة الأخيرة .. لو الأهلي في يوم من الأيام شاف ان مصلحته انك متحترفش وتفضل مع الفريق هيكون ايه موقفك حتى ولو العقد كبير ؟
طبعا انا هلبي رغبة النادي والجمهور لو محتاجني وحبيين اني اكون موجود اعتقد هكون سعيد اني أكمل
- هل هيفرق معاك لو العقد كبير وفي فريق كبير عالمي ؟
لأ الأمور دي لو انا اتكلمت عن الأمور المادية فانا كنت ممكن استمر في الخليج او اطلع اوروبا لكن انا جاي الأهلي لأن عندي رغبة داخلية للعب في الأهلي والأولاوية كانت للأهلي لأني حابب اني اكون مع الأهلي وجماهيره الكبيرة وأخلصلها
- كأس اوروبا ؟
هي دي ماتشات الكورة هو ده المستوى مفيش فريق صغير ومفيش فريق كبير
- مين اكتر فريق لفت نظرك ؟
تركيا و روسيا
- مين الفريق اللي محققش طموحاتك ؟
هولندا والبرتغال لأن الفرقتين دول نفس الأمكانيات عندهم نجوم عالميين بس مشكلتهم انهم مبيلعبوش لعب جماعي
- مين اللاعب اللي لفت نظرك في البطولة ؟
دافيد فيا وشنيدر و فان در فارت واندرية أرشيفين
- في النهاية عايز منك رسالة كبيرة من القلب مكتوبة بتوقيعك تقدمها لجمهور الأهلي
جمهور النادي الأهلي العريق أتمنى مساندتكم لي من خلال بداية مشواري مع النادي الأهلي , وأوعد ببذل أقصى جهد لحصد بطولات بالنادي وإرضاء طموحاتكم وأتمنى ان اكون عند حسن الحظ